လူထုဗဟိုပြုစီမံကိန်းအတွက် ရန်ကုန်တိုင်းအတွင်း စီမံကိန်းမြို့နယ်ရွေးချယ်ရန် ဆွေးနွေး

0
32

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီး ဌာန၊ ကျေးလက်ဒေသဖွံ့ဖြိုးတိုးတက်ရေးဦးစီးဌာနနှင့် ကမ္ဘာ့ဘဏ်တို့ ပူးပေါင်း၍ လူထုဗဟိုပြုစီမံကိန်းအတွက် ရန်ကုန်တိုင်း ဒေသကြီးအတွင်း စီမံကိန်းမြို့နယ် ရွေးချယ်ရေး အကြံဉာဏ်ရယူခြင်း အစည်းအဝေးကို ဖေဖော်ဝါရီလ ၂၅ ရက်က တိုင်းဒေသကြီး အစိုးရအဖွဲ့ရုံး၊ မင်္ဂလာခန်းမ၌ ပြုလုပ် ခဲ့ကြောင်းသိရသည်။

အဆိုပါ စီမီကိန်းကို ပြည်သူလူထုကြား ချပြ ဆွေးနွေးပြီး ပြည်သူလူထု၏ အကြံပြုချက်၊ လူထု၏ ပူးပေါင်းဆောင်ရွက်မှုများနှင့် ကြိုးပမ်းဆောင်ရွက်ခဲ့ခြင်းဖြစ်ပြီး ယင်းကဲ့သို့ ကြိုးပမ်းဆောင်ရွက်မှုသည် မိမိတို့နိုင်ငံ၏ ဒီမိုကရေစီ အသွင်ကူးပြောင်းရေး ကာလအတွက် အရေးကြီးသည့် ကူးပြောင်းဆောင်ရွက်မှု တစ်ခုဖြစ်ကြောင်း ဝန်ကြီးချုပ်က ဆိုသည်။

“ရန်ကုန်တိုင်းမှာ လူထုဗဟိုပြုစီမံကိန်းကို ပြီးခဲ့တဲ့ နှစ်တွေမှာ ထန်းတပင်၊ ကော့မှူး၊ ကွမ်းခြံကုန်း၊ ကျောက်တန်းမြို့နယ်များကို ရွေးချယ်ပြီး ဆောင်ရွက်ခဲ့ပါတယ် ၊။ဒီလို ဆောင်ရွက်ခဲ့တဲ့ မြို့နယ်တွေမှာ အောင်မြင်မှု ရလဒ်များ ရခဲ့သလို ဆက်လက်ဆောင်ရွက်နေဆဲ လုပ်ငန်းများလည်း ရှိပါတယ် ။အခုတစ်ကြိမ်မှာ ရန်ကုန်တိုင်းအတွက် တစ်မြို့နယ် ထပ်မံရရှိထားပြီး ဖြစ်ပါတယ်”ဟုရန်ကုန်တိုင်းဒေသကြီးအစိုးရအဖွဲ့၊ ဝန်ကြီးချုပ် ဦးဖြိုးမင်းသိန်းက ပြောကြားခဲ့သည်။

ထိုသို့ ဆောင်ရွက်ခဲ့သည့် မြို့နယ် ၄ မြို့နယ်အတွင်း ကျေးရွာအုပ်စုပေါင်း ၁၉၇ အုပ်စုရှိကာ ကျေးရွာပေါင်း ၆၀၀ ခန့် ရှိပြီး ယင်းကျေးရွာများ အတွင်း၌ လုပ်ငန်းပေါင်း နှစ်ထောင့်ငါးရာ သုံးခုခန့်ကို အကောင်အထည်ဖော် ဆောင်ရွက်နိုင်ခဲ့ကြောင်း သိရသည်။

“ဘာကြောင့်လဲဆို မြို့ပြနဲ့ ကျေးလက်ဖွံ့ဖြိုး တိုးတက်မှုများကို နှိုင်းယှဉ်ကြည့်မယ်ဆိုရင် မြို့ပြများသည် ဖွံ့ဖြိုးတိုးတက်မှုဖြစ်ပြီး ကျေးလက်များသည် နောက်ကျကျန်ခဲ့သည့် အခြေအနေရှိနေတာကြောင့် ကျေးလက်ဒေသ ဖွံ့ဖြိုးတိုးတက်ရေးအတွက် လူထုကိုဗဟိုပြုပြီး ပြည်သူလူထုက ၎င်းတို့ဒေသအတွက် လိုအပ်တဲ့ လုပ်ငန်းများကို ဆောင်ရွက်ပေးနိုင်ဖို့အတွက် တာဝန်ရှိတဲ့ ပုဂ္ဂိုလ်များကနေ ပေါင်းစပ် ဆောင်ရွက်ပေးသည့် ပုံသဏ္ဍန်မျိုးနဲ့ ဆောင်ရွက်ဖို့ ကြိုးပမ်းနေခြင်းဖြစ်ပါတယ် ၊ဒါကြောင့် မြို့နယ်ကို စတင်ရွေးချယ်တဲ့ နေရာမှာကို ပြည်သူလူထုကြားမှာ ကျယ်ကျယ်ပြန့်ပြန့် ဆွေးနွေးတိုင်ပင်ပြီးမှ အကြံဉာဏ်ရယူပြီး ဘယ်မြို့နယ်ကို သတ်မှတ်ရွေးချယ် မလဲဆိုတာ ဆောင်ရွက်ရမှာ ဖြစ်ပါတယ်”ဟု ဝန်ကြီးချုပ်က ဆိုသည်။

လူထုဗဟိုပြုစီမံကိန်းသည် ဖွံ့ဖြိုးရေးလုပ်ငန်းများကို လူထုကိုယ်တိုင်ရေးဆွဲ အကောင်အထည်ဖော်ခြင်း၊ ကြီးကြပ်ကွပ်ကဲ အကဲဖြတ်ခြင်းဖြင့် ရရှိလာသော ဖွံ့ဖြိုးမှု အသီးအပွင့်များကို တိုက်ရိုက် အကျိုး ခံစားခွင့် ရရှိစေမည့် ဖွံ့ဖြိုးရေး ချဉ်းကပ်မှု နည်းလမ်းဖြစ်ကြောင်းသိရသည်။

ကမ္ဘာ့ဘဏ်ထောက်ပံ့ငွေ အမေရိကန်ဒေါ်လာ သန်း ၈၀ ၊ ကမ္ဘာ့ဘဏ်ချေးငွေ ကန်ဒေါ်လာ သန်း ၄၀၀ ၊ အီတလီထောက်ပံ့ငွေ ကန်ဒေါ်လာ သုံး သန်း၊ အီတလီချေးငွေ ကန်ဒေါ်လာ နှစ် သန်း၊ DFID ထောက်ပံ့ငွေ ကန်ဒေါ်လာ သုံးသန်းနှင့် ပြည်ထောင်စုအစိုးရ ထည့်ဝင်ငွေ ကန်ဒေါ်လာ ၄၁ သန်း၊ စုစုပေါင်း အမေရိကန်ဒေါ်လာ ၅၄၉ သန်းဖြင့် မြန်မာနိုင်ငံရှိ မြို့နယ် ၆၃ မြို့နယ်တွင် အကောင်အထည်ဖော်လျက်ရှိကာ ရန်ပုံငွေပိုလျှံမှုနှင့် ထပ်မံရရှိလာမှုကြောင့် မြို့နယ်(၁၃)မြိ့နယ်အား ထပ်မံ တိုးချဲ့အကောင်အထည်ဖော်ရန် ရွေးချယ် လျက်ရှိကြောင်း သိရသည်။

ဝေဝေဖြိုး
#TheFifthWaveNews

Leave a Reply