လူမှုမီဒီယာများ၌ မရေးသားမီတွင် ဦးစွာစဉ်းစားသင့်ဟု သမ္မတဟောင်း ဘားရက်အိုဘားမား သတိပေး

0
196

နယူးဒေလီ ဒီဇင်ဘာ ၂

ခေါင်းဆောင်များအနေဖြင့် ဖေ့စ်ဘွတ်ခ်၊ တွစ်တာနှင့် ဝှက်စ်အပ်ကဲ့သို့ လူမှုမီဒီယာများ၌ ပို့စ်မလုပ်မီတွင် စဉ်းစားသင့်ကြောင်း အမေရိကန်သမ္မတဟောင်းဘားရက်အိုဘားမားက နယူးဒေလီ၌ ပြုလုပ်သော တွေ့ဆုံပွဲတစ်ခု၌ ဒီဇင်ဘာ ၁ ရက်တွင်ပြောဆိုခဲ့သည်။

လူမှုမီဒီယာများကြောင့် ရှုပ်ထွေးသိမ်မွေ့သည် ကိစ္စရပ်များနှင့်ပတ်သက်ပြီး အလျင်စလိုမှတ်ချက်ချမှုများရှိလာသောကြောင့် အိုဘားမားက ယခုလိုသတိပေးလိုက်ခြင်းဖြစ်သည်။ လူမှုမီဒီယာများ၏စွမ်းအားနှင့် ကန့်သတ်ချက်တုို့ကိုနားလည်ထားရန် လိုအပ်ကြောင်း အိုဘားမားက ပြောဆိုခဲ့သည်။ တွစ်တာ၊ ဖေ့စ်ဘွတ်ခ်နှင့် ဝှက်စ်အပ်တို့သည် ထိရောက်သော အသုံးချစရာပစ္စည်းများဖြစ်ပြီး ၎င်းတို့ကို ကောင်းသည့်နေရာတွင်သာမက ဆိုးသည့်နေရာတွင်မှာပါ အသုံးချနိုင်ကြောင်း အိုဘားမားကပြောဆိုခဲ့သည်။

တွစ်တာ၌ ဖောလိုးလုပ်သူ သန်း ၁၀၀ ရှိနေခြင်းနှင့်ပတ်သက်၍ မေးမြန်းသည့်အခါတွင် အိုဘားမားက တွစ်တာကို အခြားလူများထက်ပိုသုံးသည့်အတွက် ဖောလိုးလုပ်သူပိုများရခြင်းဖြစ်ကြောင်း ပြောဆိုခဲ့သည်။ အိုဘားမား၏ဇနီး မီရှဲကလည်း လူမှုမီဒီယာ၌ ပို့စ်မလုပ်မီတွင် စာလုံးပေါင်းကို စစ်ဆေးသင့်ပြီး စိတ်ထဲရှိသည်အားလုံးကို တွစ်တာ၌ မရေးသင့်ကြောင်း ပြောဆိုခဲ့သည်။

၂၀၁၅ ခုနှစ် ပါရီရာသီဥတုသဘောတူညီမှုစာချုပ်မှ အမေရိကန်နုတ်ထွက်မည်ဖြစ်ကြောင်း ထရမ့်က ခြိမ်းခြောက်ထားခြင်းကို အိုဘားမားက တိုက်ရိုက်ဝေဖန်ပြောဆိုခဲ့သည်။ အမေရိကန်ခေါင်းဆောင်ပိုင်းသည် ပါရီသဘောတူညီမှုနှင့်ပတ်သက်ပြီး စဉ်းစားမှုကို ခေတ္တအနားပေးထားသော်လည်း ယင်းသဘောတူညီမှုသည် မျိုးဆက်သစ်အတွက် အကျိုးရှိစေမည်ဖြစ်သောကြောင့် သဘောတူညီမှုပါအချက်များကို အကောင်အထည်ဖော်ရန် ကြိုးပမ်းရမည်ဖြစ်ကြောင်း အိုဘားမားကပြောဆိုခဲ့သည်။

ပါရီသဘောတူစာချုပ်ကြောင့် အမေရိကန်စီးပွားရေးထိခိုက်ရကြောင်းပြောဆိုကာ ထရမ့်သည် သဘောတူညီမှုမှ နုတ်ထွက်ရန် ဆုံးဖြတ်ထားသည်။

Leave a Reply