ဘင်္ဂါလီများကို ပြန်လည်လက်ခံရာတွင် နှစ်နိုင်ငံသဘောတူညီချက်အတိုင်း သေချာစွာစိစစ်၍ လက်ခံရန် တပ်ချုပ်ပြော

ဓာတ်ပုံ- တပ်မတော်ကာကွယ်ရေးဦးစီးချုပ်ရုံး Facebook

0
178

ဒီဇင်ဘာ ၂ ။ ၂၀၁၇။

တစ်ဘက်နိုင်ငံသို့ထွက်ပြေးသွားသည့် ဘင်္ဂါလီများကို ပြန်လည်လက်ခံရာတွင် နှစ်နိုင်ငံသဘောတူညီချက်အတိုင်း သေချာစွာစိစစ်၍ လက်ခံရန် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောကြားသည်။

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် ကာကွယ်ရေးဦးစီးချုပ်(ရေ) ဗိုလ်ချုပ်ကြီးတင်အောင်စန်း၊ ကာကွယ်ရေးဦးစီးချုပ်(လေ) ဗိုလ်ချုပ်ကြီးခင်အောင်မြင့်နှင့် ကာကွယ်ရေးဦးစီးချုပ်ရုံးမှ တပ်မတော်အရာရှိကြီးများ လိုက်ပါပြီး ယနေ့ နေ့လယ်ပိုင်းတွင် ဒေသကွပ်ကဲမှုစစ်ဌာနချုပ်(စစ်တွေ)သို့ ရောက်ရှိကြသည်။

ထို့နောက် အစည်းအဝေးခန်းမတွင် အနောက်ပိုင်းတိုင်းစစ်ဌာနချုပ် တိုင်းမှူး ဗိုလ်မှူးချုပ် စိုးတင့်နိုင်က ရခိုင်ပြည်နယ်အတွင်း နယ်မြေလုံခြုံရေးနှင့် တည်ငြိမ်အေးချမ်းရေးလုပ်ငန်းများ ဆောင်ရွက်ထားရှိမှု အခြေအနေများ၊ လုံခြုံရေးတပ်ဖွဲ့ဝင်များ နေရာဖြန့်ခွဲထားရှိမှုအခြေအနေများ၊ မြန်မာ-ဘင်္ဂလားဒေ့ရှ် နှစ်နိုင်ငံနယ်စပ် ခြံစည်ရိုးများ ပြန်လည်ပြုပြင်ခြင်းနှင့် အသစ်ကာရံခြင်းအတွက်ဆောင်ရွက်နေမှု အခြေအနေများ၊ နေရပ်စွန့်ခွာတိုင်းရင်းသားများအား ၎င်းတို့၏ မူလနေရပ်သို့ပြန်လည်ပို့ဆောင်ပေးမှု အခြေအနေများအား ရှင်းလင်းတင်ပြသည်။

တပ်မတော်ကာကွယ်ရေးဦးစီးချုပ်က “ဒေသခံတိုင်းရင်းသားများ၏ လုံခြုံရေးကိုစနစ်တကျကာကွယ်ပေးရမည်ဖြစ်ကြောင်း၊ ဘင်္ဂါလီ အကြမ်းဖက်သမားများ၏ လှုပ်ရှားမှုသတင်းများကိုမျက်ခြေမပြတ် ရယူပြီး နယ်မြေလုံခြုံရေး၊ နယ်မြေစိုးမိုးရေး၊ တရားဥပဒေစိုးမိုးရေးတို့အား စဉ်ဆက်မပြတ်ဆောင်ရွက်ကြရန်လိုကြောင်း၊ ဒေသဖွံ့ဖြိုးရေးနှင့် တိုင်းရင်းသားများအလုပ်အကိုင်ရရှိရေးအတွက် ရခိုင်ပြည်နယ်အစိုးရ အုပ်ချုပ်ရေးတာဝန်ရှိသူများနှင့် ပူးပေါင်း၍ ထိရောက်စွာ စီမံဆောင်ရွက်ပေးရန်လိုကြောင်း၊ တစ်ဘက်နိုင်ငံသို့ထွက်ပြေးသွားသည့် ဘင်္ဂါလီများ ပြန်လည်လက်ခံရာတွင် နှစ်နိုင်ငံသဘောတူညီချက်အတိုင်း သေချာစွာစိစစ်၍ လက်ခံရန် လိုပြီး ၎င်းင်းတို့အနေဖြင့် မြန်မာနိုင်ငံ၏ တည်ဆဲဥပဒေများအတိုင်း လိုက်နာရမည်ဖြစ်ကြောင်း၊ စာရင်းဇယားများတိကျမှန်ကန်မှုရှိအောင် စိစစ်ဆောင်ရွက်ကြရမည်ဖြစ်ကြောင်း၊ တပ်မတော်၊ ရဲတပ်ဖွဲ့၊ ဌာနဆိုင်ရာဝန်ထမ်းများအားလုံး ပြည်သူနှင့် တစ်သားတည်းရှိကြရန်အရေးကြီးကြောင်း”မှာကြားခဲ့ခြင်းဖြစ်သည်။

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် ယနေ့ညနေပိုင်းတွင် စစ်တွေတပ်နယ်ရှိ အရာရှိ၊ စစ်သည်၊ မိသားစုများအား စစ်တွေတပ်နယ်ခန်းမ၌ တွေ့ဆုံအမှာစကား ပြောကြားရာတွင်လည်း တပ်မတော် အနေဖြင့် တိုင်းပြည်၏နိုင်ငံရေး၊ စီးပွားရေး၊ စစ်ရေး အခြေအနေမှန်များကိုသိရှိထားကြရန်နှင့် ပြည်သူက ယုံကြည်အားကိုးရသည့် နိုင်ငံကအားထားရသည့် တပ်မတော်ဖြစ်အောင် စည်းကမ်းတကျ နေထိုင်ကြရန် လိုကြောင်း၊တိုင်းရင်းသားအားလုံးအမြဲတမ်းသွေးနီးဖို့၊ သွေးစည်းဖို့လိုကြောင်း၊ မိမိတို့တပ်မတော်သည် မြန်မာနိုင်ငံတစ်နံတလျားရှိ ပြည်သူများမှ ပေါက်ဖွားလာသည့် တိုင်းရင်းသားများဖြင့် ဖွဲ့စည်းထားခြင်း ဖြစ်ကြောင်း၊ ထို့ကြောင့်ပြည်သူ နှင့်တစ်သားတည်းဖြစ်ရန်လိုပြီး ပြည်သူ့အကျိုးကိုဖေါ်ဆောင်ရမည် ဖြစ်ကြောင်းဖြင့်ထည့်သွင်းပြောကြားသွားသည်။

Leave a Reply